Getur þú hugsað þér daglegt líf án rafmagns? Þessari spurningu var varpað upp á sýningarbás RARIK á glæsilegri atvinnulífssýningu sem haldin var í íþróttahúsinu á Sauðárkróki fyrstu helgina í maí. Spurningin er ögrandi og vekur fólk til umhugsunar um mikilvægi rafmagns og um hlutverk RARIK í samfélaginu. Sýningunni „Atvinna, mannlíf og menning“ sem haldin er á nokkurra ára fresti á Sauðárkróki, er ætlað að varpa ljósi á fjölbreytt atvinnu- og mannlíf í Skagafirði og kynna sprota og nýsköpun í atvinnulífinu. Þar gefst félagasamtökum og fyrirtækjum sem þjóna Skagfirðingum kostur á að kynna starfsemi sína en alls voru um 60 básar á sýningunni að þessu sinni með um eitt hundrað sýnendur.
Hjá RARIK var ákveðið að nýta þetta tækifæri til að kynna fyrirtækið en það er með starfsstöðvar á 22 stöðum á landinu og dreifir rafmagni til 90% landsbyggðarinnar. Það er því óhætt að segja að RARIK hafi átt fullt erindi á viðburð sem þennan. Það kom í hlut starfsmanna RARIK á svæðinu að standa vaktina á sýningunni og gera grein fyrir starfseminni og svara spurningum gesta. Atvinnulífssýningin, sem var ágætlega sótt, var haldin í lok árlegrar Sæluviku Skagfirðinga en um leið var þess minnst að nú eru 20 ár liðin síðan ellefu sveitarfélög í Skagafirði sameinuðust í eitt.
Sími: 528 9000
Opið:
Mán-fim 9-16 og fös 9-15