Sveitarfélög taki yfir rekstur götulýsingarkerfa

Þann 1. júlí 2016 undirrituðu fulltrúar RARIK og Vegagerðarinnar samning um afhendingu götulýsingarkerfa frá RARIK til Vegagerðarinnar, til eignar og reksturs. Um er að ræða götulýsingarkerfi á orkuveitusvæði RARIK á þeim þjóðvegum sem Vegagerðin er veghaldari á. Fara þurfti í verulegar aðgerðir til að aðgreina götulýsingu Vegagerðarinnar frá götulýsingu sveitarfélaga. Þeim aðgerðum lauk í desember s.l. með formlegri afhendingu til Vegagerðarinnar.

Uppsetning og rekstur götuljósa var eitt sinn hluti af reglulegri starfsemi dreifiveitna en skv. raforkulögum nr. 65/2003 fellur götulýsing hvorki undir einkaleyfisstarfsemi dreififyrirtækja né kemur inn í tekjuheimildir þeirra. Æskilegt er að þeir sem bera ábyrgð á vegakerfinu taki yfir eignarhald og rekstur þess götulýsingarkerfis sem er á þeirra ábyrgð.

Næstu skref eru því að fara í viðræður við sveitarfélög á orkuveitusvæði RARIK um að þau taki yfir eignarhald og rekstur á þeim götulýsingarkerfum sem eru í viðkomandi sveitarfélagi, en fram til þessa hafa þau verið bókfærð hjá dreifiveitunni, en sveitarfélögin og Vegagerðin greitt stofnkostnað og rekstur þeirra.