Viðgerð er nú lokið í Fellum á Fljótsdalshéraði en þar varð rafmagnslaust í miklu ísingarveðri um miðja síðustu viku þegar mikil ísing hlóðst á raflínur og sleit þær niður. Mæling á ísingunni sýndi um tólf sentimetra og trúlega hefur hún verið einhvers staðar þykkri. Um tíu staurar brotnuðu og varð rafmagnslaust á nokkrum bæjum í allt að 20 stundir. Á meðan unnið var að viðgerð var lögð áhersla á að hreinsa ísingu af línum og tókst með því að koma í veg fyrir frekari bilanir í kerfinu þegar mikið hvassviðri skall á aðfararnótt laugardagsins 27. janúar. Á meðan unnið var að viðgerð var rafmagni komið á með færanlegum dieselrafstöðvum þar sem þess þurfti.
Í þessari aðgerð nutu starfsmenn RARIK á Austurlandi góðrar aðstoðar Landsnets sem lagði til bæði mannskap og búnað. Á undanförnum árum hefur verið unnið markvisst að því að færa loftlínur í dreifikerfi RARIK í jarðstrengi og í kjölfarið hefur dregið mjög úr truflunum í kerfinu vegna veðurálags. Búast hefði mátt við mun umfangsmeira rafmagnsleysi vegna veðurs í vetur ef stór hluti kerfisins væri ekki í jarðstrengjum. Til stóð að setja niður nýjan jarðstreng á þessu svæði síðast liðið haust en það náðist ekki áður en fór að vetra. Efni er komið á svæðið og verður strengurinn settur niður um leið og aðstæður leyfa.
Sími: 528 9000
Opið:
Mán-fim 9-16 og fös 9-15