Merki Rarik

Fyrsta merki Rarik birtist í janúar 1985. Eftir nokkuð neikvæða umræðu um raforkumál í byrjun 9. áratugarins var ákveðið að huga betur að almannatengslum og láta hanna merki Rarik. Haldin var samkeppni meðal starfsfólks árið 1983 en engin þeirra tillaga sem barst var samþykkt. Þó var Stefán Arngrímsson verðlaunaður fyrir sína tillögu á árshátíð starfsfólks sama ár. Eftir þetta var leitað til auglýsingastofu til að hanna merkið en engin tillaga þótti uppfylla þær kröfur eða væntingar sem stjórnendur höfðu til merkisins. Á stjórnarfundi sem haldinn var á Blönduósi árið 1984 kom svo Stefán Arngrímsson fram með tillögu að myndmerki sem var samþykkt og hefur það myndmerki verið í notkun síðan. Merkið hefur ekki breyst mikið síðan þá en leturtýpan í orðmerkinu hefur þó tekið einhverjum breytingum sem og notkun lita í myndmerkinu sjálfu.