Dótturfélög

Dótturfyrirtæki RARIK eru tvö, Orkusalan ehf. sem annast orkusölu og framleiðslu og RARIK Orkuþróun ehf. sem heldur utan um ráðgjafa-og þróunarverkefni á vegum RARIK innanlands og utan.

Orkusalan ehf.

Orkusalan ehf. er dótturfyrirtæki RARIK. Orkusalan var stofnuð í  mars 2006 í kjölfar breytingar á raforkulögum 2005 en þá var samkeppni innleidd í raforkuframleiðslu og raforkusölu en orkuflutningur frá virkjun til neytenda var áfram háður einkaleyfi. Við þessa breytingu færðust framleiðslu og sölumál frá RARIK yfir til Orkusölunnar en orkudreifingin er áfram hjá móðurfélaginu.

Orkusalan ehf. er með starfsstöðvar á fjórum stöðum á landinu, Reykjavík, Akureyri, Egilsstöðum og Selfossi. Virkjanir í eigu Orkusölunnar eru Rjúkandavirkjun, Skeiðsfossvirkjun, Grímsárvirkjun, Lagarfossvirkjun og Smyrlabjargavirkjun. Uppsett afl þeirra er 37 MW.

Markmið Orkusölunnar er að vera leiðandi fyrirtæki í sölu raforku og þjónustu við raforkukaupendur.

www.orkusalan.is

Ljós og gagnaleiðari ehf.

Ljós- og gagnaleiðari ehf. er dótturfélag RARIK sem stofnað var 2009 og hefur umsjón með ljósleiðurum sem lagðir hafa verið með jarðstrengjum.

RARIK Orkuþróun ehf. (RED)

RARIK Orkuþróun ehf. er dótturfélag RARIK sem var stofnað 2008 til að sinna ráðgjafa- og þróunarverkefnum á vegum RARIK hér heima og erlendis. Erlent heiti félagsins er RARIK Energy Development Ltd. skammstafað RED. Félaginu er ætlað að  þróa, byggja og reka hvers konar orkukerfi þ.á.m.  dreifi- og flutningskerfi fyrir raforku- og hitaveitur og orkuver. Meginmarkmið starfseminnar er að stuðla að áframhaldandi vexti og verðmætasköpun innan RARIK samstæðunnar.

Í ljósi þess að RARIK hefur fyrst og fremst sinnt uppbyggingu og rekstri  raforkudreifikerfa og lítilla og meðalstórra vatnsaflsvirkjana og hitaveitna hefur þungamiðja í starfsemi RED verið á þeim vettvangi. Félaginu voru í upphafi lagðir til fjármunir í formi hlutafjár, en síðar hafa innlendu þróunarverkefnin Sunnlensk orka ehf. og Sjávarorka ehf. runnið inn í félagið. Erlendis hefur RED meðal annars komið að rannsókna- og þróunarverkefnum sem beinast að virkjun jarðvarma við fjallið Nemrud í Austur Tyrklandi.