Sagan

RARIK ohf, sem er hlutafélag í eigu ríkisins, var stofnað 1. ágúst 2006 og tók þá við rekstri Rafmagnsveitna ríkisins sem hófu starfsemi sína þann 1. janúar árið 1947. 

Meginverkefni fyrirtækisins við stofnun þess var að afla almenningi og atvinnuvegum nægrar raforku á hagstæðan hátt og hefur fyrirtækið haft mikilvægu hlutverki að gegna við öflun, dreifingu og sölu á rafmagni.

Megináhersla fyrirtækisins í dag er á raforkudreifingu og hefur verið unnið jafnt og þétt að uppbyggingu dreifikerfa í sveitum landsins, en um 90% af háspenntu dreifikerfi þar er í umsjón RARIK. Dreifikerfi RARIK nær til Vestur-, Norður-, Austur- og Suðurlands en auk þess nær dreifikerfi RARIK til 50 þéttbýliskjarna víðsvegar um landið. Lengd dreifikerfisins er um 10.000 km þar af er um 77% jarðstrengir (í lok árs 2023) en strengvæðing hófst hjá fyrirtækinu eftir 1990 eftir mikið tjón á loftlínukerfinu af völdum veðurs og verðlækkanir á strengjum sem gerðu þá að raunhæfum valkosti í stað hefðbundinna loftlína. Eignir RARIK í veitukerfum 2018 voru 44 milljarðar króna. RARIK á og rekur jafnframt fimm hitaveitur, jarðvarmaveitur í Búðardal, á Blönduósi, Siglufirði og Höfn í Hornafirði en fjarvarmaveitu á Seyðisfirði.

Með tilkomu nýrra orkulaga árið 2003 og ákvæðum um aðskilnað samkeppnis- og einkaleyfisþátta var ákveðið að stofna sérstakt dótturfélag, Orkusöluna, um framleiðslu og sölu á vegum fyrirtækisins. Orkusalan, sem tók til starfa í ársbyrjun 2007 og er í eigu RARIK ohf, starfrækir fimm virkjanir, Rjúkandavirkjun, Skeiðsfossvirkjun, Grímsárvirkjun, Lagarfossvirkjun og Smyrlabjargaárvirkjun. Uppsett afl þessara virkjana er 37 MW og er Lagarfossvirkjun þeirra stærst.

Með breytingum á raforkulögum hætti RARIK að sinna heildsölu rafmagns. Landsnet hf tók til starfa 1. janúar 2005 og er hlutverk þess að sinna meginflutningi rafmagns í landinu. Meirihluti stofnlínukerfis RARIK var seldur til Landsnets hf og eignaðist RARIK þá 22,5% hlut í Landsneti. Ríkið keypti eignarhlut RARIK í Landsneti árið 2022.

Á árinu 2008 stofnaði RARIK sérstakt félag um þróunarverkefni hér á landi og erlendis. Félagið hlaut nafnið RARIK Orkuþróun. Félaginu er ætlað að halda utan um verkefni sem hafa verið í vinnslu hjá fyrirtækinu og finna ný. Auk verkefna hér á landi eru m.a. verkefni í Tyrklandi í undirbúningi eða vinnslu. RARIK Orkuþróun er ætlað að undirbúa og þróa verkefni á sviði endurnýjanlegra orkugjafa en mun fá aðra fjárfesta til liðs við sig þegar kemur að fjármögnun stærri verkefna.

Starfsmenn RARIK samstæðunnar eru rúmlega 200. Af þeim starfa um 30% á aðalskrifstofu í Reykjavík en um 70% starfa á 20 starfsstöðvum fyrirtækisins víðs vegar um landið.