Verkfræðistofan Efla hefur að beiðni Múlaþings, HEF veitna og RARIK unnið skýrslu um möguleika á framtíðarrekstri fjarvarmaveitu á Seyðisfirði. Skýrslan var kynnt íbúum Seyðisfjarðar þriðjudaginn 17. maí sl.
Ein helsta niðurstaða skýrslunnar er að hún styður þá niðurstöðu RARIK sem kynnt var á íbúafundi árið 2017 að ekki sé hagkvæmt að setja upp miðlæga varmadælu sem nýtir varma úr sjó og ekki finnst heldur heitt vatn á svæðinu sem hægt er að nýta. Niðurstaða skýrslunnar staðfestir sömuleiðis þá niðurstöðu RARIK eftir ítarlega skoðun að í dag sé ekki neinn hagkvæmur kostur til húshitunar sem hentar öllum íbúum á Seyðisfirði og er ódýrari valkostur en bein rafhitun.
Núverandi fjarvarmaveita hefur verið rekin með talsverðu tapi á liðnum árum, þrátt fyrir að ekki hafi verið fjárfest í nýju dreifikerfi og allt kerfið hafi verið afskrifað fyrir alllöngu og þrátt fyrir að orkuverð frá fjarvarmaveitunni hafi verið sambærilegt við niðurgreidda rafhitun. Þessi niðurstaða var kynnt á íbúafundinum á Seyðisfirði árið 2017 og jafnframt sú ákvörðun RARIK að leggja fjarvarmaveituna niður. Að beiðni sveitarfélagsins var lokun frestað á meðan leitað var annarra leiða í samráði við stjórnvöld og Orkustofnun.
Staða veitunnar hefur legið fyrir um nokkurn tíma og ljóst að engar forsendur voru fyrir frekari fjárfestingum, enda hefði þurft að hækka verð veitunnar verulega til að standa undir þeim. RARIK hefur ekki talið raunhæft að gjaldskrá veitunnar væri mun hærri en kostnaður við beina rafhitun og því hefur verið leitað annarra leiða til að húshitunar á Seyðisfirði um nokkurra ára skeið. Því miður hefur enginn augljós kostur fundist sem er ódýrari en bein rafhitun og því sér RARIK enga leið aðra en að leggja fjarvarmaveituna af og aðstoða íbúa við að skipta yfir í beina rafhitun, annað hvort með hitatúpum eða varmadælum. RARIK mun nú fara í viðræður við sveitarfélagið um næstu skref.
Fréttin var uppfærð 27.05.2022, kl. 09:35.
Sími: 528 9000
Opið:
Mán-fim 9-16 og fös 9-15