Góð mæting á opinn fund um lokun hitaveitunnar á Seyðisfirði

Á fundinum fór forstjóri RARIK yfir forsendur þess að fyrirtækið telur ekki kostnaðarlega forsvaranlegt að endurnýja dreifikerfi veitunnar sem nú er að verða úr sér gengið. Enn fremur hvernig fyrirtækið sér fyrir sér hvað gæti tekið við í hitun húsnæðis á Seyðisfirði og áform um lokun veitunnar. Þá fór Magnús Ólafsson frá Íslenskum orkurannsóknum (ÍSOR) yfir þá jarðhitaleit sem farið hefur verið í á Seyðisfirði á undanförnum árum og Benedikt Guðmundsson frá Orkustofnun yfir styrki til húshitunar og reglur um styrki til kaupa á varmadælum. Að loknum erindum hófust fyrirspurnir og umræður sem fundarmenn tóku virkan þátt í og komust færri að en vildu. Óhætt er að segja að nokkur hiti hafið verið í fundarmönnun, sem m.a. gagnrýndu RARIK fyrir að hafa ekki viðhaldið kerfinu með eðlilegum hætti. Fjölmargar fyrirspurnir og eðlileg gagnrýni kom fram á fundinum sem sumum hverjum var svarað, en þó er ljóst að halda þarf annan íbúafund innan nokkurra mánaða til að fara nánar yfir þá framtíðarsýn sem hentar Seyðfirðingum best í hitun húsnæðis þeirra.

• Gögn fundarins eru að finna hér á vef Seyðisfjarðarkaupstaðar:
  www.sfk.is/is/thjonusta/husahitun