Þann 22. febrúar undirrituðu RARIK og sveitarfélagið Ölfus samning um afhendingu götulýsingarkerfa frá RARIK til sveitarfélagsins, til eignar og reksturs. Um er að ræða götulýsingarkerfið í öllu sveitarfélaginu sem ekki hefur verið yfirtekið af Vegagerðinni (sbr. frétt á rarik.is 19.01.2018).
Uppsetning og rekstur götuljósa var eitt sinn hluti af reglulegri starfsemi dreifiveitna, en skv. raforkulögum nr. 65/2003 fellur götulýsing hvorki undir einkaleyfisstarfsemi dreififyrirtækja né kemur inn í tekjuheimildir þeirra. Götulýsingarkerfin á orkuveitusvæði RARIK hafa þó fram til þessa verið bókfærð hjá dreifiveitunni, en sveitarfélögin hafa greitt stofnkostnað og rekstur þeirra. Æskilegt er að breyta þessu á þann veg að sveitarfélögin yfirtaki eignarhald og rekstur þeirra götulýsingarkerfa sem eru á þeirra ábyrgð og hefur sveitarfélagið Ölfus riðið á vaðið sem fyrsta sveitarfélagið á orkuveitusvæði RARIK sem gerir það. RARIK mun í kjölfarið taka upp viðræður við önnur sveitarfélög um sama mál.
Sími: 528 9000
Opið:
Mán-fim 9-16 og fös 9-15