Ný stjórnstöð rekstrarsviðs RARIK

Stjórnstöðin er miðlæg eining sem tekur við af fjórum svæðisvöktum sem hafa sinnt þessu verkefni hingað til með miklum ágætum ásamt öðrum störfum. Þó að stjórnstöðin sé miðlæg, eru störf í henni skilgreind sem störf án staðsetningar og starfsfólki hennar verður því dreift um veitusvæði RARIK.

Fyrsta svæðisvaktin sem stjórnstöð RARIK mun leysa af hólmi er svæðisvaktin á Vesturlandi en síðan koma svæðin inn hvert af öðru þegar líða fer á árið. Með stjórnstöðinni verður hægt að vakta dreifikerfið enn betur í stað þess að vera fyrst og fremst að bregðast við atburðum í rekstrinum. Með þessari breytingu er verið að styrkja verkferla, samræma vinnubrögð og bæta innra starf.

Viðskiptavinir sem þurfa að leita til okkar vegna bilana eiga sem fyrr að hringja í bilanasíma RARIK 528 9000.