RARIK í viðbragðsstöðu vegna slæmrar veðurspár

13.02.2020

Búist er við slæmu veðri um allt land frá því í nótt/snemma í fyrramálið og búist er við að veðrið geti valdið usla fram eftir degi á morgun föstudaginn 14. febrúar. Miklar líkur eru á að veðrið muni hafa áhrif á afhendingu rafmagns, bæði í dreifikerfi RARIK og landskerfinu (flutningskerfi Landsnets). RARIK er í viðbragðsstöðu til að bregðast við hugsanlegum bilunum á dreifikerfinu.

Endurnýjun loftlínudreifikerfisins með jarðstrengjum hefur verið langstærsta verkefni RARIK frá árinu 1992 og eru 65% kerfisins nú þegar komin í jörð. Sá hluti kerfisins sem er enn í loftlínum, er um 35% og er hann viðkvæmur fyrir þeim veðuráhrifum sem spáð er næstu daga og verður því vaktaður sérstaklega.

Þegar búast má við rafmagnstruflunum er ráðlegt að slökkva á þeim rafmagnstækjum, sem slökkva ekki á sér sjálf þegar rafmagni slær út og sem geta valdið tjóni þegar rafmagn kemur á að nýju. Þetta á meðal annars við um eldavélar og fleiri hitunartæki en einnig er ráðlegt að slökkva á viðkvæmum tækjum á borð við sjónvörp. Þá hefur reynst mörgum vel að að eiga vasaljós að grípa til því farsímaljós eru fljót að tæma farsímarafhlöður enda símarnir orkufrekir. Minnum einnig á að rafmagnsleysi getur haft áhrif á fjarskipti og ýmsa þjónustu sem er háð rafmagni.

Við sendum út upplýsingar í SMS skilaboðum til þeirra viðskiptavina sem verða rafmagnslausir. Þeir sem eru í netsambandi geta fylgst með stöðu mála í rafdreifikerfinu í kortasjá á forsíðu rarik.is. Bilanavakt er starfrækt allan sólarhringinn og bilanasímanúmer eru talin upp neðst í fæti vefsins.