RARIK þakkar hlýjar móttökur á 75 ára afmælismálþingi

Málþingin fóru fram dagana 7.-13. september í Stykkishólmi, á Selfossi, Egilsstöðum og Akureyri en þar var rætt um framtíð rafmagnsdreifingar á landsbyggðinni. Tilgangur málþinganna var að efna til umræðu um stöðu orkumála og nokkur þeirra álitamála sem uppi eru í dag eins og orkuskipti og loftlagsmál. Einnig var rætt um afhendingaröryggi raforku og hvernig RARIK sér fyrir sér að þjónustan muni þróast í komandi framtíð. Þá var fjallað um jafnréttismálin og stöðu kvenna í orkugeiranum, rætt um verðskrá RARIK og síðast en ekki síst um þau tækifæri sem kunna að felast í náinni framtíð.

Fram kom í máli Magnúsar Þórs Ásmundssonar, forstjóra RARIK, að fyrirtækið stæði frammi fyrir miklum tímum breytinga á 75 ára afmæli þess. Loftslagsváin er raunveruleg og orkuskipti munu verða mikilvæg mótvægisaðgerð þar sem RARIK getur gegnt lykilhlutverki. Einnig þurfi að að eiga sér stað hugarfarfsbreyting þar sem ekki verði litið á orku sem óþrjótandi auðlind og meiri áhersla lögð á orkunýtni og að draga úr sóun. 

• Bergur Ebbi Benediktsson, rithöfundur, sem jafnframt var ráðstefnustjóri sagði að líkt og samfélag okkar fór frá sveit yfir í borg þá er það næst á leiðinni yfir í skýið og þjónusta verði í auknum mæli sótt í skýið.
• Helga Jóhannsdóttir, framkvæmdastjóri rekstrarsviðs RARIK, kom inn á hvernig RARIK hefur kerfisbundið skipt loftlínum út fyrir jarðstrengi á síðustu þremur áratugum og nú sé 72% af dreifikerfinu komið í jörð með fækkun truflana vegna veðurs.
• Kjartan Rolf Árnason, deildarstjóri kerfisstýringar RARIK, ræddi um mikilvægi þess að dreifikerfi RARIK yrði styrkt stórkostlega og taka þurfi upp nýja tækni til að geta bæta nýtingu innviða þegar kemur að orkuskiptum.  
• Silja Rán Steinberg Sigurðardóttir, þróunarstjóri nýsköpunar og greininga hjá RARIK, sagði að þar sem  notendur RARIK borgi fyrir raforkukerfið verði verðskráin að vera sanngjörn og endurspegla kostnað.
• Hildur Harðardóttir, formaður kvenna í orkumálum og verkefnisstjóri hjá Landsvirkjun, sagði gríðarleg tækifæri fyrir fyrirtæki í orkugeiranum að leggja áherslu á fjölbreyttan starfshóp, bæði hvað varðar kyn og annan fjölbreytileika. Fjölbreytileiki skili sér í aukinni nýsköpun, skilvirkari stjórnarháttum, sterkari fjárhag og betri ákvarðanatöku.