Ylur, birta og opnunartímar um jólin

Hollráð um jólaseríur

Við hjá RARIK viljum hafa öryggið í fyrirrúmi og stuðla að betri nýtingu orku, líka yfir hátíðirnar. Jólaseríurnar skapa einstaka stemningu þennan myrkasta tíma ársins en það er mikilvægt að nota þær á öruggan hátt. 

1. Veljum öruggar seríur

• Best er að kaupa jólaseríur sem eru CE-merktar.
• Gætum þess að nota réttar seríur fyrir þær aðstæður sem þær verða notaðar í, t.d. útiseríur úti og inniseríur inni.
• Seríur sem á að nota úti þurfa að uppfylla ryk- og rakavörn, IP44 eða hærri.

2. Yfirförum seríurnar áður en þær fara upp

• Snúrur og perur þarf að skoða vel áður en seríurnar eru settar upp.
• Skipta þarf út perum sem eru sprungnar eða brotnar og athuga hvort skemmdir eru á snúrum.
• Ekki ætti að nota seríur sem eru sjáanlega skemmdar eða slitnar.

3. Hugum að innstungum og millistykkjum

• Gæta þarf þess að ekki sé of mikið álag á hverri innstungu.
• Við mælum með að notað sé fjöltengi með innbyggðri yfirálagsvörn. Gott er að hafa í huga að fjöltengi eru ekki lífstíðareign, þeim þarf að skipta út reglulega.
• Fyrir útiseríur ætti að nota innstungur sem eru með ryk- og rakavörn (IP44 eða hærra).
• Hægt er að fá vatnsþétt tengibox í flestum rafvöruverslunum sem hægt er að smella utan um fjöltengi eða samskeyti á framlengingarsnúrum.

4. Forðumst eldhættu

• Gætum þess að jólaseríur snerti ekki eldfim efni, eins og gardínur eða þurrar greinar.
• Mælt er með að hafa ekki kveikt á jólaseríum án eftirlits, sérstaklega yfir nótt.
• Íhugum að koma upp tímastilltu tengi eða snjallstýringu til að stjórna seríunum.
   

Með því að fylgja þessum ráðum getum við notið jólaljósanna og haft minni áhyggjur af öryggi eða óþarfa orkunotkun. Ef ljósin slökkna er gott að athuga hvort rof hafi verið tilkynnt á tilkynningasíðu RARIK.