Stefnumótun skilaði RARIK nýjum gildum

Frá lokum síðasta árs hefur verið unnið að stefnumótun RARIK til að mæta nýjum áskorunum í starfsumhverfi fyrirtækisins. Nauðsynlegt var að marka nýja stefnu enda miklar breytingar í starfsumhverfi fyrirtækisins, svo sem stafræn umbreyting, þróun á vinnumarkaði, þriðju orkuskiptin sem munu reynast mjög krefjandi verkefni og áhersla á loftslagsmálin almennt. Hlutverk, framtíðarsýn og markmið RARIK voru endurskoðuð í samvinnu við starfsfólk og varð niðurstaðan sú að tengja betur saman menningu fyrirtækisins og stefnu þess. Þess vegna völdum við okkur líka ný gildi sem við kynnum hér.

Það voru um 40 stjórnendur og annað starfsfólk fyrirtækisins sem hjálpuðu okkur með þátttöku sinni í stefnumótunarfundi þar sem rætt var um nýjar áherslur og tækifæri sem þeim tengjast. Auk umræðu um hlutverk og framtíðarsýn fór fram málefnastarf í nokkrum hópum þar sem markmið voru sett og umbótaverkefni skilgreind. Vinnustaðamenningin og þróun hennar var sett í forgrunn sem forsenda þess að fyrirtækið nái markmiðum sínum. Framkvæmd og eftirfylgd stefnu var jafnframt rædd sem tækifæri og áhersla komandi missera. Einnig var haldinn stefnumótunarfundur með stjórn þar sem nýjar áherslur voru ræddar frekar og þannig fékkst mikilvægt innlegg í stefnumótunina. Í byrjun árs 2023 hefur verið unnið að frágangi stefnumótunar og hlutverk, framtíðarsýn, meginmarkmið og grunngildi hafa verið staðfest af stjórn.

Samhliða stefnumótunarvinnunni fór fram umræða meðal allra starfsmanna um æskileg gildi í starfsemi fyrirtækisins og hvaða þáttum í menningu þess þyrfti að breyta. Niðurstaða þeirrar umræðu var mikilvægt framlag til skilgreiningar á grunngildum i RARIK sem nú liggja fyrir auk fjölda hugmynda og tillagna um breytingar til bóta sem síðan verður unnið að.  Nýju gildi RARIK eru hugrekki, árangur og virðing en við ætlum okkur að hafa hugrekki til að breyta rétt og horfa til framtíðar, ná árangri með drifkrafti og öruggum rekstri og loks leggjum við ríka áherslu á að bera virðingu hvert fyrir öðru, viðskiptavinum og náttúrunni.