Endurnýjun dreifikerfis í dreifbýli 2022

Samkvæmt framkvæmdaáætlun RARIK er gert ráð fyrir rúmlega 2,8 milljarða fjárfestingu í endurnýjun og aukningu dreifikerfis til sveita, og þar af verður um  2,5 milljarði varið til þrífösunar dreifikerfisins og um 80 milljónum króna verður varið í lagningu stofnkerfis á tímabilinu. Ríkisjóður mun í ár, eins og undanfarin ár, styrkja framkvæmdir vegna brothættra byggða á Mýrum í Borgarbyggð. Einnig er með aðkomu ríkissjóðs unnið eftir áætlun um að flýta þrífösun til stærri notenda.

Á forsíðu vefsins www.rarik.is er hægt að finna framkvæmdavefsjá RARIK og nálgast þar samræmdar upplýsingar um helstu framkvæmdir á vegum fyrirtækisins um allt land. Upplýsingarnar þar eru uppfærðar eftir því sem verkefnum vindur fram allt þar til þeim er lokið. Í vefsjánni birtast upplýsingar um endurnýjun dreifi- og stofnlínukerfa í dreifbýli hvort sem þau eru á áætlun RARIK um langtíma endurnýjun dreifikerfisins, eru kostuð af notendum eða eru hluti af átaksverkefnum ríkisstjórnarinnar. Auk þess eru birtar upplýsingar um verkefni sem tengjast endurnýjun búnaðar í aðveitustöðvum og byggingu nýrra aðveitustöðva.

Ef smellt er á framkvæmdaflipa kortasjárinnar, birtast framkvæmdir á korti sem hægt er að smella á til að fá nánari lýsingu á einstaka verki auk upplýsinga um verktíma, lengd, legu, spennu jarðstrengs o.s.frv.